ភ្នំពេញ៖ អ្នកនាំពាក្យក្រសួងអប់រំ យុវជន និងកីឡា លោក រស់ សុវិចារ បានប្រាប់ឱ្យដឹងថា ក្រសួងកំពុងពិនិត្យលើករណីដែលគ្រូនៃវិទ្យាល័យសម្តេចតេជោ ហ៊ុន សែន សំពៅលូន បានកាត់សក់សិស្សប្រុស បើទោះបីជាសិស្សកាត់សក់ខ្លីៗហើយក្តី។
លោកថា៖ «ក្រសួងអប់រំ យុវជន និងកីឡា កំពុងពិនិត្យករណីនេះ»។
លោកក៏បានឱ្យដឹងទៀតថា ជាទូទៅគណ:គ្រប់គ្រងគ្រឹះស្ថានសិក្សាត្រូវដោះស្រាយករណីបាតុភាពផ្សេងៗនៅតាមគ្រឹះស្ថានសិក្សា ដោយចាត់វិធានការតាមទិដ្ឋភាពជាក់ស្តែង ប្រសិនចាំបាច់ គណ:គ្រប់គ្រងគ្រឹះស្ថានសិក្សា អាចសហការជាមួយមន្ទីរអប់រំ យុវជន និងកីឡា ទាំង២៥ខេត្ត-រាជធានី ដែលជាសេនាធិការតាមឋានានុក្រមនៃក្រសួងអប់រំ យុវជន និងកីឡា។
គួរឱ្យដឹងដែរថា នៅព្រឹកថ្ងៃទី២៥ ខែមករា ឆ្នាំ២០២៣ នេះមានការភ្ញាក់ផ្អើលពីមហាជន និងបានរិះគន់ពីការចាត់វិន័យរបស់គ្រូនៃវិទ្យាល័យសម្តេចតេជោ ហ៊ុន សែន សំពៅលូន ក្នុងខេត្តបាត់ដំបង ដោយបានកាត់សក់ និងឆកសក់សិស្សប្រុសៗ បើទៅះបីជាសិស្សមួយចំនួនបានកាត់សក់ខ្លី សឹងតែគ្មានកន្លែងឱ្យឆកទៀតក្តី៕
